जीवन र सेवा | कविता | Poetry | Life and Service | Inspiration from St. Ignatius

जीवन र सेवा | दिवश पौडेल

सद्भावनाको मूलमा फुटी

म सेवाको नदीमा बगूँ

करुणाको दहभित्र 

म जीवनको अस्तित्व पाऊँ। 

आफ्नो जीवनको श्रृङ्गार

अरूको सेवाद्वारा, केवल

अरूकै जीवनमा देखूँ। 

उदारताको दर्पण

हरपल तनमनमा पाइरहूँ

मनका सारा दरारलाई  

तनका सारा तकरारलाई 

उदारताले जोडूँ।

सेवामा उदार चित्त राखी

म मुस्कान प्रवाह गरिरहूँ। 

ज्योतिको शक्तिलाई

म संसारभरि छरूँ; अनन्त!

पृथ्वीलाई ज्ञानकै चक्र

भनी उपनाम दिऊँ; समस्त!

ज्ञानले सारा जगतको

सत्यता उजागर गरूँ 

समस्या निवारण गरूँ

अनि चेतना विस्तार गरूँ।

सत्य ज्ञान र वचनको

अनुशरणले

सृष्टिमा विश्वास फैलाऊँ। 

नवसिर्जनालाई 

अझ बास्नादार बनाऊँ।

सेन्ट इग्नेसियस झैँ

अशान्तिबाट शान्तिमा

म रूपान्तरित हुन सकूँ

र शान्तिको मन्द गतिमा

म क्रान्तिकारी बन्न सकूँ।

नयाँ नयाँ रचनामा

म शान्तिले नै क्रान्ति गरूँ

क्रान्तिले नै शान्ति छरूँ।

हासोँ र खुसी छर्दै 

म अरूकै मुस्कानमा रमूँ 

अरूका ती मुस्कानले

अरूका उज्याला मनले  

अमृत अर्पण गरिरहोस् ।

मेरो जीवनलाई दृढ अनि

एकै मार्गमा तल्लीन

तिनकै शुभेच्छाले बनाओस् ।